Accueil du site / Evénements / Il è-st-èvôye

Li maîsse Pieltain dèl soce di Drou(w)ance nos-a lèyî

Lès djins di Drou(w)ance (Dréhance), d’Ans’rème èt d’ pa t’t-avau Dinant, ont stî bin pèneûs d’aprinde li mwârt di Marc Pieltain, prij’nî d’one maladîye où ç’ qui faît deur è riv’nu vicant.

Marco, po tos lès soçons, a vèyu l’ djoû à Edmonton (Londres), di l’ôte costé dèl grande basse. Il aveûve septante-chîj ans. Après-z-awè li scole normale à Arlon, "li maîsse" come on l’ lomeûve au payis dès Copêres, a scolé à Drou(w)ance, si viladje, divant di div’nu chèf di scole dès communes di Dinant. I saveûve doner sès leçons aus-èfants, bien sûr, maîs ossi, come lès maîsses d’Arthur Masson, i s’ saveûve mète u l’ minme pîd qu’ lès p’titès djuns, i causeûve leû lingadje, i lès-aspaleûve po-z-èmantchî leûs vacances d’iviêr.

Marc Pieltain, on-amichtauve soçon qui c’èsteûve plaîji dè l’ rèscontrer èt d’ taper one divise avou. Il a bouté dès-ans d’asto avou lès soçons dès boûsse (cagnotte) d’Ans’rème, li comité dès Fièsses di Drou(w)ance, lès Rwès dèl bole èt ossi l’ Soce Sinte Jènèviéve di Drou(w)ance.

Marco a aspalé l’ soce di drou(w)ance 40 ans au long. Il a faît djouwer 70 pîces è div’nant l’ mèteû al sin.ne d’one fameûse rigléye d’acteurs. One soce qui n’ compte pus sès pris àl Samwin.ne do Walon au Cente culturél di Cinè.

"Do^ç’mint dins lès basses" da Michel Robert, "Dins nosse pitit cabarèt" da Christian Derycke, "Li canari da matante da Edmond Jauquet, ostant d’ bonès comèdîyes rindûwes avou brâmint do sawè fé po lès cias qui veûyenut voltî l’ tèyâte walon. Mèrci po tot, Marco.

Di tot keûr avou l’ soce, nos présintans nos condolèyances al famile èt aus soçons da Marco.

Michel Piette